کارگل کے شہیدوں کو بریو ہارٹ مارٹیرس فاؤنڈیشن خراج عقیدت

کارگل کے شہیدوں کو یوم فتح کارگل کے موقع پر متاثرکن انداز میں خراج عقیدت پیش کیا گیا اور اس موقع پر بریو ہارٹ مارٹیرس فاؤنڈیشن کا قیام عمل میں لایا گیا جس کے بانی سید الغازی ہیں جو خود بھی جورجیا کالج کے فارغ التحصیل ہیں اور نواب فخرالملک بہادر کے خانوادہ سے تعلق رکھتے ہیں۔

26؍جولائی کو میڈیا پلس آڈیٹوریم میں کارگل وجئے دیوس کا اہتمام کیا گیا جس میں کرنل اندرپال سنگھ، مس سدھا جین، مس ایشیا پیسیفک، جناب محمد خلیق الرحمن، وائس پرنسپل پلوی اسکول مسز ودیا راؤ، مسٹر رمیش جشنانی اور کئی سرکردہ شخصیات نے شرکت کی۔ بیرسٹر صادقہ سلطانہ نے صدارت کی۔ اس موقع پر 1948ء سے 1999ء تک ہندوستانی سپاہیوں کی اپنے وطن عزیز کے لئے قربانیوں پر متاثر کن ڈاکومنٹری فلم پیش کی گئی۔ سیدالغازی نے اس موقع پر اعلان کیا کہ بریو ہارٹ مارٹرس فاؤنڈیشن کی جانب سے شہیدان وطن پر ٹیلی سیریل اور فیچر فلم ’’برننگ راون‘‘ بنائی جائے گی۔ ای میگزین بھی نکالی جائے گی۔

اس موقع پر اعلان کیا گیا کہ مسٹر سید الغازی کو نومبر 2018ء میں دہلی میں منعقد ہونے والی انٹرنیشنل میڈیا سمٹ کے موقع پر بریو ہارٹ ایوارڈ دیا جائے گا۔