ریاض میں IICC کے زیر اہتمام ڈاکٹر منور رانا کا تعزیتی جلسہ

ریاض میں IICC کے زیر اہتمام ڈاکٹر منور رانا کا تعزیتی جلسہ
ریاض۔ نمائیندہ گواہ
سعودی عرب میں انڈیا اسلامک کلچرل سینٹر کی بین الاقوامی شاخ ریاض اور جامعہ الیومنائی ایسوسی ایشن ریاض کی جانب سے مرحوم شاعر کو خراج عقیدت پیش کیا گیا۔
سعودی عرب کے دارالحکومت ریاض میں عالمی شہرت یافتہ شاعرڈا کٹر منور رانا  کے اعزاز میں تعزیتی جلسہ اور دعائیہ مجلس کا انعقاد کیا گیا۔ جلسے میں مرحوم شاعرکو اردو ادب کے لئے اْن کی بیش بہا خدمات اور قومی او رملی معاملات میں ان کے نظریا تی  اور اصولی موقف پر انھیں خراج تحسین پیش کیا گیا۔ جلسہ میں بڑی تعداد میں ہندوستانی تنظیموں کے نمائندگان اور اردو زبان و ادب کے شائقین نے شرکت کی اور مرحوم شاعر کی خدمات کو یاد کیا۔
جلسہ سے خطاب کرتے ہوئے کنگ سعود یونیورسٹی کے پروفیسر اور کئی کتابوں کے مصنف ڈاکٹر سرور حسین نیکہا کہ منور رانا  صاحب کی وفات سے  اردو زبان و ادب اور ہندستان کی تہذیب کا  ایک ناقابل تلافی نقصان ہوا ہے۔ پروفیسر حسین نے کہاکہ منور رانا  نے ماں کی عظمت کو اپنی شاعری کے توسط سے جس طرح مقبول کیا اس کی مثال نہیں ملتی۔جلسہ سے خطاب کرتے ہوئے انڈیا اسلامک کلچرل سینٹر کے بین الاقوامی کنوینر   مرشد کمال نے کہا کہ   منور رانا ایک عظیم شاعر ہونے کے ساتھ ساتھ ایک  حساس طبیعت اورنیک  دل انسان بھی تھے جس کی نمایاں جھلک ان کی شاعری میں دکھائی دیتی ہے۔ مرشد کمال نے کہا کہ ایک ایسے وقت میں جب حق بات کو ببانگ دہل کہنے والوں اور اپنے موقف پر مضبوطی سے قائم رہنے والوں کی کمی ہوتی جا رہی ہے، منور رانا کا ہمارے درمیان سے رخصت ہوجا نا قوم و ملت کا ایک نا قابل تلافی نقصان ہے۔
جامعہ ملیہ الیومنائی اسوسی ایشن ریاض  کے صدرانجینئر غفران احمد، جامعہ ملیہ اسلامیہ الیومنائی اسوسی ایشن کے سابق صدرانجینئر خورشید انور، جامعہ ملیہ اسلامیہ الیومنائی اسوسی ایشن کے سابق صدور سید آفتاب علی نظامی، جامعہ ملیہ اسلامیہ الیومنائی کے ایک اور سابق صدر انجینئر انیس الرحمن نے بھی مرحوم شاعر کو خراج عقیدت پیش کیا۔
مفتی شبیر احمد ندوی نے مرحوم شاعر کا مختصر خاکہ پیش کرتے ہوئے کہا کہ منور رانا ایک درد مند، قوم و ملت کے بہی خواہ اور محب وطن انسان تھے۔ چودھری احسان عظیم نے کہا کہ منور رانا لکھنؤ اور گنگا جمنی تہذیب کے سچے امین تھے۔علی گڑھ مسلم یونیورسٹی اولڈ بوائز اسوسی ایشن کے صدر ارشد علی خان نے اپنے خطاب میں کہا کہ مرحوم شاعر اپنی  سدا بہار شاعری کے حوالے سے ہمیشہ یا د کیے جائینگے اور ان کے اشعار ہمیں غیرت اور حمیت کا درس دیتے  رہینگے۔ ندوی الیومنائی اوسی ایشن کے صدرمولانا احسن ندوی، مولانا  عبدالرحمٰن عمری نے مرحوم شاعر کے اشعار پیش کیے۔  جلسے سے معروف شعراء منصور قاسمی، ضیاء عرشی اور پروفیسر انیس انصاری  نے بھی خطاب کیا۔ جلسہ سید آفتاب علی نظامی کے دعائیہ کلمات  پر اختتام پذیر ہوا۔
جلسہ کے اہم شرکاء میں جامعہ الیومنائی اسوی ایشن کے نائب صدر نیمو خان، جنرل سکریٹری طارق امام، سابق جوائنٹ سکریٹری نوشاد عالم، عتیق احمد، تنظیم بسواس کے جنرل سکریٹری اختر الاسلام، عرب نیوز کے راشد  حسن، عادل جہانگیر، سید منیرالدین، امداد ندوی، وسیع اللہ ندوی، محمد شمس، باسط ابو معاذ وغیر ہ شامل رہے۔